...
...
  1. Нүүр
  2. Нийгэм

Монгол Улс дэлхийн хоёрдугаар дайны төгсгөл "Чөлөөлөх дайн”-д оролцсон нь

 42    Өнөөдөр 16:18

Зөвлөлт Холбоот Улс, Монгол Улстай хамтран 1945 оны наймдугаар сард Хятадын нутаг дахь Японы Квантуны армид цохилт өгөх зорилготой Чөлөөлөх дайнд оролцсон нь Монголын түүхэнд төдийгүй дэлхийн II дайны төгсгөлийн хувь заяанд чухал хувь нэмэр болсон түүхэн үйл явдал байлаа.

Монгол Улс тухайн үед ЗХУ-тай харилцан туслалцах гэрээтэй, холбоотны байр суурьтай байсан бөгөөд Япон Улс Манжуур, Өвөр Монгол, Зүүн Хятадын нутагт түрэмгийлэл үйлдэж, бүс нутгийн аюулгүй байдалд заналхийлж байв. Үүнээс өмнө 1939 онд болсон Халх голын дайнд Зөвлөлт-Монголын цэрэг ялсан ч Японы тал зүүн хойд Хятадад ихээхэн хэмжээний цэргийн хүч хуримтлуулж, манай улсын аюулгүй байдал, тусгаар тогтнолд шууд аюул учруулж байсныг мартаж болохгүй. Тиймээс Японы милитаризмыг ялж, бүс нутгийн энх тайвныг сэргээх, мөн олон улсад эх орныхоо тусгаар тогтнолыг хүлээн зөвшөөрүүлэх томоохон дипломат зорилгоор Монгол Улс Чөлөөлөх дайнд оролцсон юм.

Монгол Улс энэ дайнд Монгол Ардын хувьсгалт цэргийн 5, 6, 7, 8 дугаар Морьт дивиз, морьт тусгай хороод, 7 дугаар механикжуулсан хуягт бригад, танк, их буу, авто тээврийн болон холбооны тусгай хороо, нисэх холимог дивиз гэх мэт нийт 22 мянга орчим хүнтэй хүч, зэвсэг техниктэй оролцсон байна. Монголын арми Хянганы нурууг даван, Манжуурын гүнд давшиж, ЗХУ-ын армитай хамт Японы Квантуны армийг бут цохиход томоохон үүрэг гүйцэтгэсэн юм.

Чөлөөлөх дайнд оролцсоны түүхэн ач холбогдол нь Монгол Улс дэлхийн II дайны ялагч орны нэгэн болж, олон улсын тавцанд хүлээн зөвшөөрөгдөх үйл явц хурдассан явдал байлаа. Чөлөөлөх дайны дараа 1945 оны 10 дугаар сард Монгол Улсын тусгаар тогтнолын тухай үндэсний санал асуулга явагдаж, иргэд 100 хувь дэмжсэн юм. Үүний үр дүнд 1946 онд БНХАУ Монголын тусгаар тогтнолыг хүлээн зөвшөөрсөн нь дэлхийн улсуудын хандлагад томоохон нөлөө үзүүлжээ.

Өнөө цагт бид энэ үйл явдлыг дурсах нь зүгээр нэг түүх сөхөж буй хэрэг биш. Харин эх орны маань газар нутгийн бүрэн бүтэн байдал, тусгаар тогтнол ямар их үнэ цэнтэйг, манай эцэг өвгөд түүнийхээ төлөө хэрхэн тууштай тэмцэж чадсаныг санах хэрэгтэй. Энэхүү тэмцэл ард түмэн эв нэгдэлтэй, эр зоригтой байсныг батлан харуулсан билээ. 

Монголын тусгаар тогтнол мөнх оршиг!

#ЧөлөөлөхДайн #МонголТусгаарТогтнол #ТүүхээМэдье #August1945

Via: @Монгол Цэргийн Нэгдсэн Холбоо

 

 42    Өнөөдөр 16:18
Энэхүү мэдээ нь зохиогчийн эрх зөрчсөн, зохисгүй агуулга оруулсан, бусдын эрх ашигт халдсан байвал дараах утсаар мэдэгдэнэ үү: 99503250
Сэтгэгдэл илгээхийн тулд хариуг оруулна уу
Сэтгэгдэл (0)

Онцлох мэдээ

Зохиогчийн эрх хуулиар хамгаалагдсан болно.

BreakingNews.mn сайтын уран бүтээлчид, сэтгүүлчдийн мэдээллийг
редакцийн зөвшөөрөлгүй хуулбарлах, цацах, ямар нэгэн хэлбэрээр ашиглахыг хориглоно.