...
...

Олон улсын роботын тэмцээнд амжилт үзүүлсэн хүүхдүүдийг хүлээн авч уулзлаа

Өнөөдөр   БСШУС-ын  дэд сайд Г.Ганбаяр   Олон улсын Роботын хүүхэд залуусын тэмцээнд амжилт үзүүлсэн “Оюуны тулга” дунд сургуулийн хүүхдүүдийг хүлээн авч уулзлаа.  Өнгөрсөн 04 дүгээр сарын 10-16-ны    өдрүүдэд Румын улсын   Орадео   хотод болсон Олон улсын Роботын найм дахь удаагийн тэмцээн болсон бөгөөд “Тояа” академийн харьяа “Оюуны тулга” сургуулийн эдгээр авьяаслаг хүүхдүүд дэлхийн 20 гаруй орны 61 багийн хүүхдүүдтэй өрсөлдөж хоёр баг 3-р байр, нэг баг 5-р байранд орж багийн амжилтаараа 1-р байранд шалгарсан амжилттай иржээ. 

Хүүхдийн инженер сэтгэлгээг хөгжүүлж, системийн боловсролыг Монголд түгээн дэлгэрүүлэх зорилготойгоор “Оюуны тулга” дунд сургууль 2014 оноос “Бяцхан инженер” хөтөлбөрт сургалт явуулж эхэлсэн бөгөөд өнөөдрийн байдлаар 1-5 дугаар ангийн 70 орчим хүүхэд уг хөтөлбөрт хамрагдаж байгаа аж. Энэ удаагийн тэмцээнээс өмнө 2015 онд Бээжинд болсон Олон улсын Роботын тэмцээнд мөн хоёр баг оролцсоноос нэг баг нь 5-р байранд орж амжилт үзүүлжээ.

Тус сургуулийн Газар зүйн баг, “Бяцхан инженер” хөтөлбөрийн сургагч багш Э.Марал-Эрдэнэ хэлэхдээ, “Монгол хүүхдүүд илүү их инженер сэтгэлгээтэй болж байна. 10 настай хүүхдүүд өөрсдөө программ бичиж, робот угсарч байна. Системийн боловсролыг Монголд анхлан хөгжүүлсэн сургуулиудын нэг нь манайх. Түүнээс гарсан амжилтаа салбар яамны удирдлагууддаа танилцуулах зорилгоор мөн бяцхан инженер хүүхдүүдээ урам зориг өгөх үүднээс өнөөдрийн уулзалтыг хийхийг хүссэн юм. Хүлээн авч уулзаж хүүхдүүдэд маань урам зориг өгсөн дэд сайд Г.Ганбаярт баярлалаа” гэсэн юм.

Румын улсын Орадео хотод болсон Олон улсын Роботын тэмцээнээс 3-р баяр эзэлсэн “Golden robot” багийн ахлагч, “Оюуны тулга” дунд сургуулийн 5-р ангийн сурагч О.Түвшинбат, “Энэ тэмцээнд оролцохын тулд хоёр сар гаруй бэлдэж 3-р байранд орсондоо баяртай байна. Дараагийн тэмцээнд оролцохдоо машинаа засаад программаа сайн бичих нь чухал юм байна гэсэн сургамжтай ирсэн. Миний хувьд 1-р ангид орсноосоо хойш “Бяцхан инженер” хөтөлбөрт хамрагдсан” гэсэн бол тус багийн гишүүн, 6-р ангийн сурагч н.Баатарбилэг, “Би 5-р ангиасаа эхэлж “Бяцхан инженер”-т суралцсан. Зургадугаар ангиасаа энэ тэмцээнд оролцож амжилт үзүүлсэндээ баяртай байна. Бид лего роботын төрлөөр өрсөлдсөн. Хамгийн хүчтэй өрсөлдөгч нь 1-р байранд орсон Румын Улсын Кевин гэж хүү байсан” гэлээ.  Өнөөдрийн Олон улсын тэмцээний ялагчид, маргаашийн монгол инженерүүдэд БСШУС-ын сайд Г.Ганбаяр эх орныхоо нэрийг дэлхийн тавцанд оюуны спортоор гаргасанд бахархаж буйгаа илэрхийлээд англи хэлээ сайн сурч, ирээдүйн чадалтай инженерүүд болохыг хүсч ШУТСангаас Хүүхдийн баярт зориулсан гаргасан 4D “Амьтан судлал” номын дээжээс гардууллаа.

 

Энэхүү мэдээ нь зохиогчийн эрх зөрчсөн, зохисгүй агуулга оруулсан, бусдын эрх ашигт халдсан байвал дараах утсаар мэдэгдэнэ үү: 99503250
Сэтгэгдэл илгээхийн тулд хариуг оруулна уу
Сэтгэгдэл (0)

Онцлох мэдээ