НӨАТ-ын урамшууллын супер азтан болох 400 сая төгрөгийн эзэн өчигдөр тодорсон. НӨАТ-ын сугалаа болон супер азтаны тухай тодруулахаар Гааль, татварын ерөнхий газрын Мэдээлэл технологийн төвийн НӨАТ-ын мэргэжилтэн Б.Чинзоригтой уулзлаа.    

-400 сая төгрөгийн азтан тодорлоо. Дэлгэрэнгүй мэдээлэл өгөх үү?

-1-р сарын 27-ны өдөр “Оргил” худалдааны төвийн Амгалангийн салбараас худалдан авалт хийсэн хүн 400 сая төгрөгийн эзэн боллоо. Одоо тухайн хүн өөрийнхөө баримтыг ebarimt.mn-д бүртгүүлээд Гааль татварын ерөнхий газарт хүсэлтээ өгөөд ямар нэг татвар шимтгэл төлөхгүйгээр 100 хувь 400 сая төгрөгөө авна. Яг одоогийн байдлаар супер азтан бүртгүүлэхээр ирээгүй байна. Мөн сугалаагаа ebarimt.mn сайтад бүртгүүлээгүй байна.

-Заавал бүртгүүлсэн байх шаардлагатай юу?

-Тийм. Иргэд нэг зүйлийг сайн ойлгох хэрэгтэй. Хонжвор хожсон хүмүүс маань ebarimt.mn-ийн бүртгэлийн дансны тохиргоо хэсэгт “өөрийн дансаа бичнэ үү” гэсэн шаардлага тавьж байгаа. Өөрийнхөө дансыг үнэн зөв тохируулах хэрэгтэй. Тодруулбал, өөрийнхөө овог нэр, регистрийн дугаар, банкны нэр, банкны дансны дугаар орж байгаа. Үүн дээр сануулахад, регистрийн дугаарыг оруулахдаа урд талын үсгээ кирилл үсгээр оруулаад, заавал өөрийнхөө нэр дээр байдаг дансыг бичих хэрэгтэй. Хүмүүс энэ дээр алдаад байдаг. Зарим нэг хүмүүс хугацаа нь дууссан дансны дугаар биччихсэн байх жишээтэй. Сүүлийн тохирлоор л гэхэд 2000 хүн дансны дугаараа буруу бичсэн байсан 

Бүх мэдээлэл нь үнэн зөв болсон ebarimt.mn сайтын хэрэглэгч нарт ажлын 20 хоног дотор багтаад мөнгө нь шууд очно. 20000, 100000 төгрөгийн азтан бол дансанд нь 20 хоногт шууд орно. Харин 500 мянгаас дээш мөнгөн дүн хожсон хүн Гааль, татварын ерөнхий газар ирж хүсэлт бөглөнө. Ирэхдээ өөрийнхөө хожсон баримттай ирвэл илүү сайн. Ингээд хүсэлтээ өгсний дараа ажлын 20 хоногийн дотор багтаад урамшуулал нь орно.

-НӨАТ-ын урамшууллын талаар хүмүүс нэгдсэн ойлголтгүй байна л даа. Зөв, буруу гээд л...?

-Хүмүүс жаахан буруу ойлголттой яваад байгаа. НӨАТ-ын хувь гээд байгаа үнэ дээр дахиад 10 хувь нэмсэн юм шиг ойлгоод байгаа. Бид бол НӨАТ төлөгч, аж ахуй нэгжүүд бол НӨАТ суутган төлөгч. Бидний өдөр тутмын хэрэглээ болох гар утасны төлбөр, бензин, хоол хүнс гээд бүх хэрэглээний 70-90 хувьд НӨАТ шингэсэн байдаг. Бид НӨАТ төлөгч гэдгээ мэдэхгүй худалдан авалт хийгээд 10 хувиа улсад төлж байсан. Харин одоо төлсөн НӨАТ-ынхаа 2 хувийг бид буцаагаад авчихаж байна. Нэмээд бид  ebarimt.mn  сайтаар дамжуулаад сугалаанд орох боломжтой болгож өгч байна.

-Хонжворын сан хэрхэн бүрддэг юм бэ?

-Хонжворын сан улсын төсөвт суучихсан байгаа. НӨАТ-ын хуулийн шинэчлэлийн дагуу бүх зүйл явж байгаа гэв.

НӨАТ-ын урамшууллын системээс нийтдээ 70 470 азтан тодроод байна. Үүний 5924 иргэнд 234 420 000 төгрөгийг Төрийн сангаас олгожээ. Хэдийгээр иргэд олноороо азтан болж байгаа хэдий ч  сугалаагаар хожсон мөнгөө  гар дээрээ авч буй нь цөөхөн байгаа аж. Өөрөөр хэлбэл, нийт азтануудын 10 хүрэхгүй хувь нь мөнгөө авчээ. Учир нь иргэд гар дээр буй баримтаа системд бүртгүүлэхдээ хойрго хандах, эсвэл мэдэхгүй өнгөрч байгаа аж.  Одоогоор супер азтан буюу 400 сая төгрөгийг нэг хүн, 20 сая төгрөгийг нэг, дөрвөн сая төгрөгийг 21, 500 мянган төгрөгийг 226 хүн, 100 мянган төгрөгийг 2250 хүн, 20 мянга төгрөгийг 22 066 хүн хожжээ. Жилд улсын төсвөөс 22 тэрбум төгрөгийн шагналын сантай сугалаа явуулна хэмээн анх зарлаж байсан. Өчигдрийн байдлаар нийтдээ 1.2 тэрбум төгрөгийн азтан тодорсон хэдий ч 10 хүрэхгүй хувь нь мөнгөө авчээ.

С.Баяр

Эх сурвалж: Breakingnews.mn