...

...

“KING TUG” Н.ТӨГСЦОГТ WBA холбооны түр аваргын бүсийн төлөө тулалдана

1465 2021-6-24

Ц.Энхтүвшин Таван цагариг сонин

Монгол Улсын гавьяат тамирчин, сонирхогчдын боксын Олимпийн болон дэлхийн аваргын мөнгөн медальт Нямбаярын Төгсцогт мэргэжлийн боксын рингэн дэх 14 дэх тулаанаа долдугаар сарын 3-нд Калифорниа мужийн Карсон хотын “Dignity Health Sports Park” цэнгэлдэхэд хийхээр боллоо. 2015 оноос мэргэжлийн боксын рингэнд тулалдаж эхэлсэн “King Tug” Төгсцогт маань өнгөрсөн хугацаанд 13 тулаан хийснээс 12-т нь ялалт(9 КО) байгуулж, 57,2 кг -ийн жинд( 126 lbs ) IBO холбооны аварга болж, WBC холбооны аваргын бүсийн төлөө тулалдаж байсныг манай спорт, бокс сонирхогчид сайн мэднэ.

Харин энэ удаа Төгсцогт маань өөр холбооны аваргын бүсийн төлөө, өмнө нь тулалдаж байгаагүй жинд өрсөлдөх гэж байна. Тодруулбал WBA( World Boxing Association) холбооны superfeather буюу 58,9 кг ( 130 lbs) -ийн жингийн INTERIM CHAMPION title -Түр аваргын бүсийн төлөө уг бүсийг эзэмшигч Крис Кольберттой тулалдах юм.

ТОДРУУЛГА: Interim title буюу Түр аваргын бүсийг аль нэгэн жинд аварга бүс эзэмшигч нь эрүүл мэнд, хууль зүйн болон бусад шалтгаанаар аварга цолоо хамгаалах тулаан хийхгүй байгаа тохиолдолд тухайн жингийн чансаагаар өндөр хоёр боксчныг тулалдуулан хэн ялсанд олгодог. Аварга цол эзэмшигч цолоо хамгаалах тулаан хийх боломжтой болмогцоо түр аваргатай Аваргын төлөө тулалдах ёстой байдаг билээ. Хэрэв

аварга рингэнд дахин гарахгүй, эсвэл өөр холбоо, өөр жинд шилжвэл Түр аварга жинхэнэ аваргад тооцогдож аварга болдог дүрэмтэй.

Манай “King Tug”-ийн энэ удаагийн өрсөлдөгч Крис Кольберт нь 1996 онд төрсөн , Нью Йорк мужийн Брүүклин хотын унаган хүүхэд бөгөөд мэргэжлийн боксын рингэнд 15 тулаан ( 6 КО) хийхдээ ялагдал амсаагүй байгаа, 2020 оноос хойш WBA холбооны 58,9 кг-ийн жингийн чансааны нэгдүгээрт бичигддэг, Түр аварга цол бүсийг эзэмшиж, бүсээ нэг удаа хамгаалаад байгаа боксчин. Кольберт нь “Prime time” хочтой, 173 см өндөр, хоёр гарын алд 180 см ( Төгсөө 170см өндөр, хоёр гарын алд 170см ) хүрдэг юм байна.

Тэрбээр Түр аваргын бүсээ хамгаалах тулаанаа Кубын нэрт боксчин , Олимпийн аварга, мэргэжлийн боксын WBA, IBF холбооны хэд хэдэн жинд дэлхийн аварга болж байсан, энэ жил 39 настай Юриоркис Гамбоатай хийх ёстой байсан ч Гамбоа бэлтгэлийн үеэр хавиргандаа гэмтэл авч, тулалдах боломжгүй болсон ажээ.

Тулааныг Америкийн SHOWTIME телесуваг 2021 оны долдугаар сарын 3-ны орой Америкийн баруун эргийн цагаар 6:00 pm -аас шууд дамжуулан үзүүлэх бөгөөд энэ үдшийн гол тулаан нь Төгсцогт-Кольберт нарын тулаан байх юм.

Харин Dignity Health Sports Park-д үзэх тасалбар 50-200 ам.долларын үнэтэй байгаа бөгөөд axs.com сайтаар онлайнаар худалдан авч болно.

Өнөөдөр буюу зургадугаар сарын 23-нд Tugstsogt Nyambayar Tugstsogt Tugstsogt Төгсөөгийн төрсөн өдөр. Төрсөн өдрийн мэнд хүргэе!

	“KING TUG” Н.ТӨГСЦОГТ WBA холбооны түр аваргын бүсийн төлөө тулалдана
	Бусдад түгээх
	breakingnews.mn Facebook

1465 2021-6-24

Энэхүү мэдээ нь зохиогчийн эрх зөрчсөн, зохисгүй агуулга оруулсан, бусдын эрх ашигт халдсан байвал дараах утсаар мэдэгдэнэ үү: 99503250

Сэтгэгдэл (0)

Онцлох мэдээ

Зохиогчийн эрх хуулиар хамгаалагдсан болно.

BreakingNews.mn сайтын уран бүтээлчид, сэтгүүлчдийн мэдээллийг
редакцийн зөвшөөрөлгүй хуулбарлах, цацах, ямар нэгэн хэлбэрээр ашиглахыг хориглоно.