Монгол Улсын Ерөнхий сайд Л.Оюун-Эрдэнэ энэ сарын 02-нд УИХ-ын нэр бүхий гишүүдийг вакцины татан авалтад нөлөөлж, эх орноосоо урвасан үйлдэл гаргасан гэх ноцтой мэдэгдэл хийсэн Хэрэв шаардлагатай бол нэрсийг нь олон нийтэд зарлана гэдгээ ч давхар дайсан юм. 

Өөрөөр хэлбэл, Ерөнхий сайд Л.Оюун-Эрдэнэ "Зарим нэг улстөрч нэг ч вакцин татан авахгүй, нэг ч вакцин үйлдвэрлэж чадахгүй хэр нь битгий гай бол. Манай зарим улстөрчдийн хариуцлаггүй үйлдэл, вакцины татан авалтад нөлөөлсөн. Цар тахлын хажуугаар би улстөржихгүйг хичээж ирсэн. Асар их тэвчээр гаргаж явж байна. Шаардлагатай бол тэр УИХ-ын гишүүдийн нэрийг зарлана. Эрүүл мэндийн том системийн эсрэг явж, зохион байгуулалттай буруу мэдээлэл өгч байгаа нь эх орноосоо урвасан үйлдэл шүү. Энэ асуудал дээр нэр бүхий улс төрийн алиа салбадай нарт хатуухан анхааруулж байна" хэмээн байр сууриа илэрхийлсэн билээ. 

Тэгвэл өнгөрсөн даваа /2021.05.09/ гарагт Ерөнхий сайд Л.Оюун-Эрдэнийн Засгийн газар 100 хоногт хийж, хэрэгжүүлсэн ажлаа олон нийтэд тайлагнасан. Энэ үеэр Ерөнхий сайд Л.Оюун-Эрдэнэ эрх мэдэл, албан тушаалаа ашиглаж вакцины татан авалтад нөөлөлж, эх орноосоо урвасан үйлдэл гаргасан гэх улстөрчийн нэрийг зарлаж, ил болголоо.

Тэрбээр "Вакцинжуулалттай холбоотой асуудлыг улстөржүүлсэн олон асуудал байсан. Асуудлыг хурцатгаж яах вэ гэж бодоод чимээгүй явсан. Онцгой үүрэг гүйцэтгэсэн хүн бол УИХ-ын дэд дарга С.Одонтуяа, түүний гэр бүлийн хүн Г.Өлзийбүрэн нар юм. Тэд зарим сэтгүүлчидтэй ярьж, гаалийн байцаагч нар руу утасдаж, дарамталсан асуудал гарсан. Төрийн өндөр албан тушаалтан ийм зүйл гаргаж болохгүй. Энэ асуудлыг би шалгуулна. УИХ-ын дэд дарга хүн гаалийн байцаагч руу утасдаж, дарамталж Засгийн газрын үйл ажиллагааг гуйвуулах нь ёс зүйд таарахгүй. Би тэр хүнийг хүндэлдэг. Гэтэл маш их харамсмаар үйлдэл тэр болон түүний гэр бүлийн хүн дээр гарсан. Цар тахал бол тоглоом биш" гэж ярьсан юм. 

Харин Ерөнхий сайд Л.Оюун-Эрдэнийн мэдэгдэлд УИХ-ын дэд дарга С.Одонтуяа тайлбар өгсөн юм.

Тэрбээр "Би вакцин татаж авах хөрөнгөө төсөвт суулгаач, иргэдэд вакцинаа сонголттой хийлгэх боломж олгооч гэсэн хоёр өнцгөөс л дуугарч ирсэн. Энэ агуулгаар Засгийн газрын үйл ажиллагааг шүүмжилсэн нь үнэн. Шүүмжилсний төлөө ийм үндэслэлгүй асуудлаар гүтгэж байна. Үүнийг хуулийн байгууллагад хандаж шалгуулна. Сөрөг хүчин бол эрх баригч талыг шүүмжлэх, тэдэнд хяналт тавих эрх үүрэгтэйгээр үйл ажиллагаа явуулдаг. Үүнийгээ хийсний төлөө ийм хандлага үзүүлж болохгүй. УИХ-ын чуулган дээр хэд хэдэн удаа Ерөнхий сайдыг өөрөө орж ирж, цар тахлын нөхцөл байдлаа тайлагна гэж  асуудал тавьсан. Харин вакцин гацаах санаа ямар ч хүнд байхгүй. Эсрэгээрээ өөрсдийнх нь үйл ажиллагаа вакциныг гацаасныг нотлох болно" хэмээн мэдэгдэв. 

Эндээс харахад ямартай ч Ерөнхий сайд Л.Оюун-Эрдэнэ, УИХ-ын дэд дарга С.Одонтуяа хоёр шүүх дээр уулзах нь тодорхой болж байна. Харин тэдний хэн үнэн, худал ярьж байгаа шүүх эцэслэнэ. Өөрөөр хэлбэл, Ерөнхий сайд Л.Оюун-Эрдэнэ УИХ-ын дэд дарга С.Одонтуяаг гүтгэв үү, эсвэл УИХ-ын дэд дарга С.Одонтуяа Ерөнхий сайдын мэдэгдлийг үгүйсгэж, гүрийв үү гэдгийг шүүх байгууллага л шийднэ.