Аймшиг дагуулсан хот

Бидний амьдарч буй хотод азгүй явдлууд нүүрлэх боллоо гэсэн дүгнэлтийг нэгэн иргэн хийснээ бидэнд илгээсэн юм. Энэ бүхнийг ар араасаа гарч буй аймшигтай гэмт хэргүүд бэлхнээ гэрчилж байна. Уншигч таныг тавгүйтүүлье гэсэн үүднээс энэ сэдвийг хөндсөнгүй. Гагцхүү нийгэмд нүүрлэж байгаа бусармаг зүйлээс сэрэмжлүүлэх үүднээс дурдаж буй нь энэ. Золгүй тохиолдлоор тэдэн хүн амиа алдлаа, замын осолд төчнөөн хүн өртлөө, архи ууж эрүүлжүүлэгдсэн хүний тоо тэдэн зууд хүрлээ, хар тамхи татаж мансуурсан иргэдийг цагдаа баривчиллаа гэсэн гэмт хэргийн мэдээлэл телевизийн дэлгэц, сонины нүүрэнд бууж байна. Тоолж гүйцэмгүй гарах болсон гэмт хэргийн зөвхөн өнгөрсөн долоо хоногт гарсныг тоймлон хүргэж байна.

Архичдын хороолол

Улаанбаатарыг “Архичдын хороолол” гэж нэрлэхэд хилсдэхээргүй болчихож. Энэ сарын 12-17-ны хооронд буюу тавхан хоногт Нийслэлийн дүүргүүдийн Цагдаагийн хэлтсийн Эрүүлжүүлэх байранд нийтдээ 1014 хүн хоногложээ. Тавхан хоногт мянга гаруй хүн эрүүлжүүлэх байрны үүдийг татаж байна аа гэж бодохоор 20 хоногт дөрвөн мянга, 40 хоногт 80 мянга гараад явчихна. Тэгэхээр жилд хэдэн хүн эрүүлжүүлэгдэхэв. Бодоод үз дээ. Цөөнгүй оронтой тоо гарна. Гэхдээ энэ бол зөвхөн эрүүлжүүлэх байранд хүргэгдэн ирсэн хүмүүсийн л тоо. Харин үүний цаана архи ууж, ухаанаа алдагсад эрүүлжүүлэгдсэнээсээ ч илүү байх нь ойлгомжтой. Ингээд бодохоор Нийслэл хотод согтуу иргэдийн эзлэх хувь ихээхэн байгаа нь анзаарагдах байх. Архи хэтрүүлэн хэрэглэсэн эдгээр иргэд Нийслэлд гарч буй гэмт хэрэг, зөрчлийн 80 хувийг үйлддэг болохыг цагдаагийн байгууллагаас тогтоосон байна.

Аминд халтай орчин

Золгүй тохиолдлоор амиа алдагсдын тоо Нийслэлийн цагдаагийн газарт 34-т хүрч бүртгэгджээ. Энэ сарын 12-17-ны хооронд буюу тавхан хоногт шүү дээ. Өчигдөр Баянхошууны зам дээр гарсан авто ослын улмаас хоёр хүн амь насаа алдаж, өглөө хичээлдээ гарсан оюутан бүсгүй хүндээр бэртжээ. Иймэрхүү хар мэдээ өдөр бүр дуулдана. Орой гэртээ харьж яваад золбин нохойд хазуулах бол наад захын явдал. ШУТИС-иас Багшийн дээдийн автобусны буудал руу бүрий болсон хойно явж байсан иргэн таглаагүй траншейны нүхэнд бүдрэн эгмээ хугалж, гэмтлийн эмнэлэгт хүргэгдээд хэвтэрт байгаа аж. Улаанбаатарт хамгийн их хоцрогдож хойноосоо уршиг дагуулж байгаа нэг зүйл гэвэл хөдөлмөр хамгаалал. үйлдвэр аж ахуйн газар, ажил олгогч нар ажилчдынхаа аюулгүй байдлыг анхаарахдаа дэндүү хойрго болсноос ажилдаа явсан хүн эргэж ирээгүй олон тохиолдол гарчээ. Иймэрхүү жишээг олныг дурьдаж болно. Яг энэ цаг үед хальтиргаа гулгаа ид эхэлж байна. Гулгаж ойчоод хөлөө хугалж, гэмтэж бэртсэн гэх дуудлага гэмтлийн эмнэлгийн дуудлагын утсыг амраахаа байжээ. Энэ бас л нэг аюул нэмэгдэж байгаа хэрэг.

Хаа сайгүй хулгайчид

Монгол Улсад сүүлийн 10 жилд 200 мянган хулгайн гэмт хэрэг үйлдэгдэж энэхүү  гэмт хэргийн улмаас 350 тэрбум төгрөгийн хохирол учирчээ. Эдгээрээс ердөө 20 хувийг хэрэг мөрдөн байцаах шатанд нөхөн төлүүлжээ. Арван жилээр гаргасан судалгаагаар сүүлийн үед гэмт хэргийн тоо буурч буй ч нийслэлд эсрэгээрээ нэмэгдэх хандлагатай байна.  Энэ нь хүн амын төвлөрлийн төв нь нийслэл хот болж,  үүнийг дагаад гэмт хэрэг ихэсч байна гэж албаныхан тайбарлав. Улаанбаатар Баянзүрх, Сонгинохайрхан, Баянгол дүүрэгт гэмт хэрэг их гардаг байна. Хулгайн гэмт хэрэг дотор  орон байр,  халаасны хулгай дийлэнхи хувийг эзэлж буй юм.

Ийнхүү амьдарч буй нийгэм маань айдас түгшүүрт автаад байна. Сэрэмж, болгоомж, анхаарал, авхаалжаа л сайжруулахгүй бол гэмт хэргийн золиос болж, магадгүй гэмтэж бэртэхийн ч газар үгүй юм.

С.Баяр

Эх сурвалж: Breakingnews.mn