Москвагийн оршин суугч, 27 настай Жамиля бүсгүй Оросын улс түмнүүдийн найрамдлын Их сургуулийн Гадаад хэлний институтийг төгссөн бөгөөд хайртай хүнийхээ хоёр дахь эхнэр болж, исламын уламжлалт гэр бүлийн нэг хэсэг болохоор сайн дураараа шийдсэн байна.

Ингээд түүний ярьсан түүхийг хөрвүүлэн толилуулъя.

Олон эхнэртэй байх ёс заншлыг би өмнө нь огт дэмждэггүй байсан бөгөөд ямар нэгэн байдлаар буруу үйлдэл хэмээн тооцдог байлаа. Эр нөхрөө бурханчлан шүтдэг эмэгтэйчүүд л иймэрхүү балай заншлыг зөвшөөрдөг биз хэмээн дотроо дооглонгуй боддог байв.

Шашин шүтлэгийн хувьд би мусульман хэдий ч тиймэрхүү ёс заншил байдаггүй орчинд өсч хүмүүжсэн болохоор тэр талаар төсөөлж чаддаггүй байлаа. Өөрийнхөө нөхрийг 4 эхнэртэй байхыг нь яаж зөвшөөрч чаддаг байнаа? Ой ухаанд ч төсөөлөгдмөөргүй юм. Энэ чинь сэтгэл зүрхийг шархлуулмаар урвалт, араар тавилт мөн биз дээ? Иймд энэ зүйл байж боломгүй.

Гэвч “Хүн давахгүй гэсэн даваагаараа долоо давна” гэгчээр, нэг л өдөр миний өмнө энэ талаар сонголт хийх мөч тулгардаг юм байна!

Анхны хайр

Би хэдийгээр уугуул, жижиг Чечень улсдаа өсч өндийгөөгүй ч гэсэн намайг маш чанга хатуу ёс заншлын дагуу хүмүүжүүлсэн билээ. Москва надад ямар нэгэн байдлаар сөрөг нөлөө үзүүлсэнгүй.

Би энгийн даруухан байж, хөвгүүдтэй ямар нэгэн байдлаар зууралдаж байсангүй. Ном унших маш дуртай байсан учраас бүхий л зүйлийг умартан, зөвхөн ном л уншдаг байлаа. Гэвч гэнэт би дурлачихлаа...

Тэр мөчөөс хойш би өөрийнхөө мөрөөдлийн ертөнцөд амьдардаг болов. Түүнтэй ярилцан, захидал бичилцэж, зугаалан, ерөнхийдөө бидний харилцаа цэвэр тунгалаг байсан юм. Мэдээж, бидний хооронд бэлгийн харилцаа байсангүй.

Гэвч би түүний цор ганц хайрт биш гэдгийг мэдсэн юм. Тэр өөрийн биологийн хэрэгцээгээ өөр бүсгүйтэй хангадаг байж. Үүнийг мэдээд надад гомдолтой, зовуурьтай байсан хэдий ч цаг хугацаа өнгөрөх хэрээр түүнтэй эвлэрэхэд хүрсэн билээ.

Бид албан ёсоор гэрлээгүй учраас түүнийг 100% буруутгаж бас чадахгүй байв. Бид бол шаардлагатай гэж үзсэн, өөрийн хүссэн зүйлсээ хийх эрх бүхий чөлөөт хүмүүс шүү дээ гэж бодож байлаа.

Энэ хүн надад үнэн сэтгэлээсээ дурласан хэдий ч өөр эмэгтэйг гэргийгээ болгож авсан гэдгийг бүхий л зүрх сэтгэлээрээ мэдэрдэг байв. Тэр эхнэртэйгээ танил ч бус байсан бөгөөд маш шашинлаг, ариун ёс суртахуунтай сайн бүсгүй хэмээн ойр дотныхон нь түүнд санал болгож гэрлүүлсэн аж.

Харин түүний эцэг эх нь хүүгээ ахин гэрлэх болбол эсэргүүцэхгүй гэсэн байна. Гэвч түүний зүгээс надад гэр бүл болох санал тавихгүй л байлаа. Магадгүй, тэр намайг хүний хоёр дахь эхнэр болох чадвартай бус хэмээн тооцож байсан байх.

Бодол санааны тарчлаан

Дараагийн хоёр жил миний хувьд маш хүнд өнгөрөв. Би амьдралынхаа бүхий л утга учрыг алдсан мэт санагдах боллоо. Гэвч Москва намайг нүдээ нээхэд минь тусалсан юм. Би маш олон янзын хүмүүстэй харилцан, юунд ч төдийлөн шүүмжлэлтэй хандахаа болив. Бодол, хандлагаа өөрчлөхөд Их сургууль маань ч мөн тусаллаа. Би курсын ажил, дипломоо Кавказын олон үндэстнүүдийн тухай бичиж хамгаалсан юм.

Олон эхнэртэй ёс заншилд хандах миний үзэл бодол ч аажмаар өөрчлөгдөж эхэллээ. Эхнэртэй эрчүүд эртнээс л өөрийн ахын бэлэвсэн гэргийг ганцаардуулахгүйн тулд эхнэрээ болгон авдаг байж. Энэ нь нэг бодлын буянлаг үйлс мэт.

Олон эхнэртэй байх заншлын мөн чанар нь тэднийг бүгдийг нь аз жаргалтай байлгахад оршдог гэнэ. Мөн эрчүүд хомсдолтой тохиолдолд бас эерэг талтай аж.

Гэвч би өөрөө цор ганц эхнэр нь бус гэр бүл дотор өөрийгөө амьдарна гэж бодохоор эхлээд надад маш таагүй санагдаж байлаа. Өөрөөр хэлбэл, дотроо маш зөрчилтэй байв.

Насан туршийн хайр

Гэнэт миний амьдралд ТЭР ороод ирэв. Тэр бол “ийм л хүнтэй гэр бүл болно доо” хэмээн миний төсөөлж байсантай таарахгүй хүн байлаа. Тэрээр оюуны хөдөлмөр эрхэлдэггүй, музей сонирхдоггүй, хаа тааралдсан газраа унтаж чаддаг нэгэн. Гэвч тэр халамжтай, сэтгэл сайтай. Амьдралд хайртай, түүнийг үнэлж цэгнэж чаддаг нь надад их таалагдсан.

Түүнийг эхнэртэй гэдгийг би хожуу мэдсэн юм. Тэрээр өөрийн авааль эхнэрийн тухай ярихаар нэгэн удаа зориг гарган надад хэлсэн. Түүнийг сонсоод яг л нам цохиулах мэт болж билээ.  Гэвч би түүнийг хайрлахаа больсонгүй. Түүнийг ямар ч бэрхшээлээс айхгүй гэдгийг би мэдэж байв. Тэр хоёр эхнэртэй байсан ч хоёуланг нь аз жаргалтай байлгахын төлөө бүхий л боломжтой зүйлийг хийх чадвартай хүн.

Олон эхнэртэй байх заншил манай шашны бүх хүмүүст ч таарах зүйл биш аж. Ойр дотныхон маань гэхэд, миний шийдвэрийг тун эмзэг хүлээн авсан. Ээж минь ингэж хэлэв: “Би чамайг аливаа зүйлийг ойлгох чадвартай, сайн хүүхэд гэж тооцдог байлаа.  Түүний эхнэрийн тухай чи ер нь бодолцож үзсэн үү? Тэр эмэгтэйд ямархуу мэдрэмж төрөх бол?”

Түүний хэлсэн үгс намайг шархлуулах мэт болов. Мэдээж, би энэ талаар нэг бус удаа бодолцож үзсэн. Иймээс ч өөрийнхөө зөвшөөрлийг тэр даруйд нь өгөөгүй билээ. Түүний авааль гэргий энэ бүхэнтэй эвлэж зохицох чадвартай гэж тэрээр надад итгүүлж чадсан юм.

Бид хоёрын аль нэггүйгээр тэр өөрийнхөө амьдралыг төсөөлж чадахгүй гэсэн. Би түүнтэй бүр урд насны төөргөөр учрах тавилантай байсан гэдэгт тэр итгэлтэй байсан. Миний түүнийг гэх сэтгэл ч мөн улам ихэссээр байв.

Авааль эхнэртэй нь харьцах талаар

Би түүний эхнэрийг сайн ойлгож байлаа. Тэр бүсгүй Түүний төлөө юуг л бол юуг уучилж өршөөхөд бэлэн байв. Тийм эр хүнтэй хамт амьдрахын тулд юуг ч хийхэд бэлэн байсан.

Би ч Түүнтэй хамт байхын тулд маш их эр зориг гаргасан. Одоо түүний эхнэр Чеченьд амьдарч байгаа. Би түүнтэй анх уулзах мөчийг төсөөлөн бодсоор. Түүнээс эр нөхрийг нь булаах явдал миний зорилго биш гэдгийг тэрээр ойлгоосой, би тэдний гэр бүлийг нураахын тулд тэнд очиж буй хэрэг биш, харин нэг хэсэг нь болж, түүний итгэл найдварыг хүртэхээр ирсэн гэдгийг тэр бүсгүй ойлгоосой гэж хүсч байна.

Хүнд хайрлагдаж амьдрахыг би өөртөө зөвшөөрсөн. Харин одоо түүний авааль эхнэртэй хамт хэзээний сайн найзуудын адилаар гал тогооны өрөөндөө ярилцаж суухыг, мөн түүнтэй бүхий л сэдвээр хөгжилтэй яриа өрнүүлэн, өөрсдийнхөө хайртай эр нөхөрт хоол унд бэлтгэж өгөхийг мөрөөдөж байна.

Д.Мигаа

Эх сурвалж: Breakingnews.mn