...
...
  1. Нүүр
  2. Нийгэм

Албан хаагчид тангараг өргөлөө

 205    2017-10-23

УИХ-аас шинэчлэн батлагдсан Шүүхийн шийдвэр гүйцэтгэх хуульд “Шүүхийн шийдвэр гүйцэтгэх байгууллагын алба хаагчийн тангараг”-т өөрчлөлт орсонтой холбогдуулан Хууль сахиулахын их сургуулийн захирлын тушаалаар тус сургуулийн Шүүхийн шийдвэр гүйцэтгэх байгууллагын цол бүхий албан хаагчид болон магистр, эчнээ дамжааны суралцагчид 2017 оны 10 дугаар сарын 23-ны өдөр Шүүхийн шийдвэр гүйцэтгэх байгууллагын ажилтны тангараг, Төрийн жинхэнэ албан хаагчийн тангараг  өргөлөө.

Тангараг өргөх ёслолын арга хэмжээнд Их сургуулийн Албаны зохион байгуулалт, санхүү хангамж эрхэлсэн дэд захирал, цагдаагийн хурандаа Д.Ядамдорж болон Их сургуулийн захирлын зөвлөлийн гишүүд оролцов.

Энэхүү арга хэмжээний үеэр Шүүхийн шийдвэр гүйцэтгэлийн сургуулийн захирал, хууль зүйн ухааны доктор, профессор, хурандаа Н.Гантулга бие бүрэлдэхүүнд хандаж үг хэллээ. Тэрбээр “Ардын хувьсгалтай нас чацуу ШШГБ-ын тогтолцоо, зохион байгуулалтын бүтэц, үйл ажиллагаа, алба хаагчдын эрх зүйн байдлыг өнөө цаг үеийн шаардлага, олон улсын нийтлэг жишигтэй уялдуулан хуульчилсан 8 дахь удаагийн салбарын төрөлжсөн хуулийг Монгол Улсын хууль тогтоох байгууллага-УИХ 2017 оны 06-р сарын 09-ний өдөр баталж 2017 оны 07-р сарын 01-ний өдрөөс улс орон даяар даган мөрдөж байна.

Энэ хууль ШШГБ-ыг эрүү, иргэн, захиргааны шүүхийн шийдвэрийг хуульд заасан бүрэн эрхийн хүрээнд хэрэгжүүлэх төрийн тусгай чиг үүрэг бүхий гүйцэтгэх засаглалын байгууллага, алба хаагчдыг төрийн жинхэнэ бөгөөд цэргийн алба хаагч болохыг дахин тодотгон бататгасан.

Өнөөдөр бид монгол төр, хууль цаазын баялаг түүх, уламжлал, нэр хүндээр шалгагдан батжиж албаны мөн чанар, үйл ажиллагааг тодорхойлогч шалгуур болсон ШШГБ-ын алба хаагчдын тангараг өргөлөө.

ШШГБ-ын ажил үүрэг бол иргэдээс төрийг үнэлэхэд голлох үзүүлэлт болдог нэн хариуцлагатай бөгөөд өргөн мэдлэг боловсрол, өндөр ёс зүй, харилцааны эв дүй, хариуцлага хүлээх чадвар, мэдрэмж шаардсан онцлог ажил юм. Иймд  энэ бүхнийг цаг ямагт алхам тутамдаа  хэрэгжүүлэн ажиллах ёстойг удирдах ажилтны хувиар та бүхэнд үүрэг болгон, багш сурган хүмүүжүүлэгчийн хувиар зөвлөн уриалж байна” гэлээ. 

 205    2017-10-23
Энэхүү мэдээ нь зохиогчийн эрх зөрчсөн, зохисгүй агуулга оруулсан, бусдын эрх ашигт халдсан байвал дараах утсаар мэдэгдэнэ үү: 99503250
Сэтгэгдэл илгээхийн тулд хариуг оруулна уу
Сэтгэгдэл (0)

Онцлох мэдээ

Зохиогчийн эрх хуулиар хамгаалагдсан болно.

BreakingNews.mn сайтын уран бүтээлчид, сэтгүүлчдийн мэдээллийг
редакцийн зөвшөөрөлгүй хуулбарлах, цацах, ямар нэгэн хэлбэрээр ашиглахыг хориглоно.