Манай сайт Улсын их хурлын ээлжит сонгууль дөхөж байгаатай холбоотойгоор “Битүү морь” хэмээх булангаа нээж байна. Энэхүү булангаараа их улс төрд шинээр орж ирж байгаа, сонгуульд өрсөлдөн амжилт гаргах өндөр магадлалтай эрхмүүдийг цувралаар танилцуулах юм.

Бичин жил гарах сар шинийн босгон дээр ирэх сонгуулийн ерөнхий дүр зураг тодорч эхэллээ. Нам намаас сонгуульд “сойгдож” магадгүй байсан “Битүү морьд”-ын түрүүч нь гарааны зурхай руу хөдлөв бололтой. Энэ жилийн сонгуулийн нэг онцлог нь шинэ, залуу, чадварлаг хүмүүсийг хүсч буй ард түмний хүлээлт юм. Иймээс нийгмийн энэхүү эрэлт хэрэгцээнд тулгуурлан намууд нэр дэвшигчдээ бэлтгэж байгаа нь ажиглагдана.

Ирэх сонгуулиар цээжинд давхиж мэдэх “Битүү морьд”-ын тоонд “Оргил”-ын хэмээн овоглогдсон Жамбалын Ганбаатарын нэр сонсогдож эхлэв. Тэрээр Налайх хотод 1973 онд төрсөн, Баянгол дүүргээс ажил бизнесийн гараагаа эхэлсэн нэгэн. Эдийн засагч, хуульч мэргэжилтэй. Эхнэр дөрвөн хүүхдийн хамт амьдардаг. 2008-2012 онд Баянголоос НИТХ-д төлөөлөгчөөр сонгогдон ажиллаж, улстөрийн тодорхой хэмжээний туршлагатай болсон энэ залуу бизнесмен их улс төрд эргэлт буцалтгүй зорьсон гэлтэй харагдах боллоо.

Ардчилсан хувьсгал эхлэх үед социализмын нурангин дээр шинэ амьдралыг цогцлоох гэж зүтгэсэн олон ганзагачдын жирийн нэг төлөөлөл өнөөдөр өөрийн бүтээх ёстой баялгийг бүтээсэн гэж дүгнээд дараагийн алхмаа хийх санаа төржээ гэж өөдрөгөөр харж болох талтай. Багаасаа ажил хөдөлмөрт өөрийгөө нухалж өссөн Ж.Ганбаатарыг бизнестээ бол үнэхээр “хатуу самар” гэх юм билээ. Ажил хэрэгтээ хатуу зарчим барьдаг, шулуун шударга зантай түүнийг найз нөхөд, бизнесийн хүрээнийхэн нь ийнхүү хочилсон гэх. “Оргил” худалдааны төвийнхөө 10 гаруй салбарыг нийслэл болон хөдөөгийн зарим аймагт нээсэн тэрбээр хэдэн жилийн өмнөөс барилгын бизнест хүч сорьж, өдгөө хотын гангачуул дунд жинхэнэ моодонд ороод байгаа “Энканто таун” хотхоноо босгоод байгаа. Спорт комплекс, найман давхар гараж гээд Монголдоо анхдагч олон зүйлийг агуулсан Энкантод хүмүүс ам сайтай байх юм билээ.

Ямартай ч Alpen Gold шоколад, Стиморол бохийг Монголд үүрч оруулж ирж байсан залуу хүү өнөөдөр Монголын бизнесийн салбарт бол нэрээ дуурсгасан чадварлаг удирдагчдын нэг болж чаджээ.

Он солигдох мөч, цагаан сарын үеэр зурагт, сошлоор хамгийн их гарсан хүмүүсийн нэг нь “Оргил”-ын Ж.Ганбаатар. Суваг солино Ж.Ганбаатар, фэйсбүүк нээнэ Ж.Ганбаатар. Оны өмнө Баянголын бүх цэцэрлэгт бэлгээр “бороо оруулж”, сургуулийн ахлах ангийн хүүхдүүдэд ном тарааж, ахмадуудыг ч баярлуулахаа мартсангүй. Өөрөө үүнийгээ жил бүр хийж ирсэн уламжлалт ажил гэж тайлбарлаж байгаа. Тийм байж болох ч энэ жил түүний эдгээр ажил нь олны анхаарлыг илүү их татлаа. Бизнес нь ил боловч, өөрөө нууцлаг явж ирсэн түүний дүр төрх олон түмэнд шинэхэн бөгөөд соньхон хүрч байх шиг. Ямартай ч мөнгөтэй бол мөнгөтэй, бас ч хийсэн юмтай, хэлэх үгтэй энэ залууг Ардын намын удирдлагууд Баянгол дүүргээс Улсын их хурлын сонгуульд сойх нь тодорхой болж байх шиг.

600 гаруй хүнийг ажлын байраар хангаж, Монголдоо томоохон бүтээн байгуулалтын ажлуудыг амжуулсан Ж.Ганбаатар төрөөс нэг ч удаа тендер аваагүй, “засагт зэвтэй хадаас ч шахахгүй ээ” гэж ярьж явдгаараа бизнесийнхэн дунд онцгой нэр хүндтэй явж ирсэн нь улстөрд чухал имиж байж болох талтай.

Баянгол дүүрэг рүү дуутайхан, цуутайхан мордсон бизнесийн “хатуу самар” их улстөрд хэр газар авахыг харах л үлдэх шив.

Д.Билгүүн